Orashon di dia 17 januari 2018

Hesus Misericordioso # 3

Tata di amor na principio di un dia nobo nos ta sumamente agradecido na Bo pa regala nos e tesoro di mas grandi cu ta bida. Awe nos ta desea di trece den Bo presencia tur nos debilidadnan, nos inquietudnan y tur otro problemanan. Aunke con grandi nos problemanan ta nos ta consiente cu Abo ta mas grandi cu tur problema. Bo tin un solucion pa cada problema. Bo poder ta inmenso. Bo por habri porta cu ta cera y Abo por haci lo imposibel bira posibel. No tin ningun barera ni obstaculo cu por stroba Bo di haci Bo santa boluntad. Bo amor ta riba tur otro cos. Mescos cu den e Evangelio di awe Bo ta cura hende riba dia di sabat. ( Mc. 3, 1-6 ) Hopi biaha nos tin e solucion pa un problema pero nos no tin e curashi di implemente. Of nos tin miedo di dal un stap padilanti. Señor Bo amor no tin limite, Bo misericordia ta insondabel. Si Dios ta na nos fabor, ken por ta contra nos. Tata misericordioso duna nos e curashi pa confia den Bo apesar di tur dificultad y obstaculo. Cura nos di tur nos enfermedadnan na alma, curpa, mente y spirito. Hesus den Bo nos ta confia. Amen

Posted in Orashon di Dia

Orashon di dia 16 januari 2018

images-1
Tata bondadoso Abo ta manifesta Bo mes hasta den e detaye di mas chikito di dia den e forma di un amor inimaginabel . Danki pa regala nos e don di Bo presencia. Danki pa duna nos e animo y e forza cu Bo ta pone den nos curazon pa nos por sigui padilanti. No permiti cu nos miedo y flakesa ta haci nos incapaz di continua e lucha di ser cada dia mas miho. Nos ta entrega Bo tur nos preocupacionnan y carganan y nos ta suplica Bo pa sigui bendishona nos pa semper nos ta fortaleci y dispuesto pa continua cu e retonan cu presenta den nos bida. Yuda nos pa nos no huzga otro segun aparencia. Manera e Evangelio di awe ta bisa cu e farizeonan tawata huzga e discipelnan di Hesus pasobra nan tawata piki tapushi di trigo ariba un sabat. ( Mc. 2, 23-28 ) Señor nos Dios ta Abo so conoce y ta wak intencion di curazon di hende. No laga nos huzga otro pa aparencia. Maske tur hende rechasa nos y bisa cu nos no por nada y cu nos no ta sirbi pa nada, laga nos corda cu tin un hende cu ta yama nos, ta spera riba nos y cu kier pa nos sirbi’E manera nos ta. Yuda nos dirigi nos mirada riba Señor y laga E transforma nos pa medio di su misericordia y Dios ta capaz di haci cosnan maravilloso den cada un di nos. Amen.
Posted in Orashon di Dia

Orashon di dia 15 januari 2018

Bon siman garoshi

Tata Santo riba e dia di awe mi ta pidi Bo yuda mi pa mi tene den mente cu mi unico salbacion ta di sigui Bo cu henter mi mente y curazon. Mi ta desea cu mi bida ta orienta riba Bo, scucha Bo boz den mi curazon y comprende kico Bo kier pa mi. Duna mi e posibilidad di ser semper agradecido y no lubida facilmente tur e bendicionnan cu Bo a regala mi. Bo ta yama cada un di nos pa biba den santidad y pesey Bo ta prepara un caminda di bida interior pa nos cu ta mará na obedencia na Señor atraves di su Palabra cu ta guia nos alma. Hesus a bini pa duna nos e biña nobo y berdadero cu ta duna sabor y alegria den nos bida. Pero nos no mag di lubida cu una bez nos ricibi Hesus den nos bida, nos a bira hende nobo y nos no mag bai bek den nos bida bieuw, e bida di antes. Manera e Evangelio di awe ta bisa nos: No sa basha biña nobo den saco di biña bieuw. ( Mc. 2, 18-22 ) Señor nos Dios duna cada un di nos e forza di boluntad pa nos bisa si na Bo y no na tur loke ta malo. Duna nos e fortaleza pa haci Bo boluntad. Yuda nos ta yiunan obedecido cu ta desea di haci nos maximo esfuerzo pa cana den e caminda di santidad pa medio di Cristo nos Señor. Amen.

Posted in Orashon di Dia

Orashon di dia 14 januari 2018

IMG_0214

Danki Tata pa e animo cu Bo ta regala cada un di nos pa nos cuminsa cada dia di nobo. Danki cu Bo ta yuda nos pa nos no laga nos wordo venci pa tentacionnan. Cada dia di nobo nos kier habri nos curazon mescos cu un flor ta habri cada dia di nobo. Nos ta desea di tin un encuentro cu Bo. E miho regalo cu nos por haya ta ora nos a conoce Bo y ora nos a haya un encuentro personal cu Bo ta lo mehor cu por a pasa cu cada un di nos den nos bida. E alegria di mas grandi ta pa nos laga otronan cera conoci cu Bo Palabra y obranan. Den e Evangelio di awe Bo ta encontra cu Bo prome discipelnan. ( Hn. 1, 35-42 ) E yamada ta cuminsa cu un encuentro cu Dios cu ta transforma nos bida por completo. Tata misericordioso den e aña nobo aki nos kier para keto un rato y tuma un decision pa haya un encuentro personal cu Bo. Ta Abo so por cambia nos bida. Duna nos e curashi pa unabes nos haya un encuentro cu Bo pa nos por trece nos sernan keri tambe cerca Dios pa nan tambe por experiencia e misericordia y amor di Dios. Danki Tata cu tur momento nos por conta cu Bo. Amen.

Posted in Orashon di Dia

Orashon di dia 13 januari 2018

hesus bati na porta

Tata Santo danki pa tur e amor cu Bo a deposita den mi curazon. Danki cu Bo ta mi amigo fiel cu nunca ta faya mi y cu mi por conta cu n’E incondicional. Danki pa consola mi den mi angustia y pena. Duna mi e fortaleza pa mi sigui lucha pa mi salbacion y pa mi no cai den e trampa di e enemigo cu ta busca tur manera pa haci mi daño. Mi ta desea di tin un curazon generoso. Den e Lectura di awe Bo ta yama Levi pa sigui Bo y un dia Bo a bai come na cas di Levi y ora e dokternan di ley di e grupo di fariseo nan a mira Bo ta come hunto cu e cobradonan di belasting nan a puntra Bo discipelnan:” Pakico Bo ta sinta come hunto cu tipo di hendenan aki?” Hesus a contesta nan : ” Hende bon di salú no mester di dokter, hende malo si. Mi no a bin pa yama hende hustu ma pa yama pecador. ” ( Mc. 2, 13-17) Hesus ta stima pecador ma E no ta stima nan picánan. Tur dia Hesus ta yama nos na nos nomber pa nos bini cerca dj’E manera nos ta pa E cambia nos. Dushi Hesus bendishona Bo ta pa yama cada un di nos na nos nomber pa bin sigui Bo. Duna nos e gracia pa reconoce Bo como nos Gran dokter cu tin poder pa cura nos na alma y cura. Amen.

Posted in Orashon di Dia

Orashon di dia 12 januari 2018

IMG_0092

Danki Tata cu awe nos por conta cu Bo atrobe. Danki cu Bo ta sigui obra milagro y maravilla den nos bida. Danki pa Bo fieldad cu semper Bo tey pa consola nos den nos penanan. Nos ta kere den Bo sabiduria cu ta guia nos pa tuma decisionnan cu ta hiba nos na triunfo. Pesey awe nos ta desea di pone tur nos proyectonan, nos plannan, nos soñonan den Bo mannan todopoderoso. Den e Lectura di awe nos por lesa cu Hesus ta cura un homber lam. ( Mc. 2, 1-12 ) apesar di tur obstaculo e amigonan di e homber lam no a perde fe ni confianza y a haci tur nan esfuerzo pa hiba e homber lam cerca Hesus. Nos ta dispuesto pa hala tur obstaculo un banda pa hiba nos rumannan den presencia di Hesus? Tata misericordioso hopi biaha nos ta laga tur obstaculo stroba nos di haci e trabou cu Bo ta manda nos haci. Duna nos e forza di boluntad pa kibra tur barera pa gana alma pa Bo. Yuda nos kita tur duda y falta di fe pa otronan por experimenta Bo gran misericordia y amor. Pordona nos tur momento cu nos no tawata tin e curashi di ta dispuesto pa yuda un ruman sali for di su miseria. Amen.

Posted in Orashon di Dia

Orashon special pa Venezuela y Aruba

Aruba ban bek serka Dios

Señor nos Dios nos ta gradici Bo pa un dia mas y cu Bo forza por compaña nos pa nos por haci e humilde oracion aki pa nos pais bisiña Venezuela.

Tata di misericordia tene Bo mannan compasivo y Bo lenso di misericordia pa por seca e lagrimanan di dolor y tristeza cu Bo yiunan na Venezuela y Aruba ta pasando aden. Abo cu ta e Husto Huez laga Bo husticia prevalece riba tur maldad y pensamentonan ironeo di e gobernantenan. Cu Bo por manda un aire fresco di pordon riba tur e erornan cu a wordo cometi pa falta di conocemento di Dios su bondad y fieldad. Duna nos un otro oportunidad pa nos por restaura atrobe e relacion entre nos cu Bo, Tata Celestial. Manera Hesus a siña nos den su Evangelio cu nos mester ta obediente na Bo mandatonan y cu nos pueblo por ricibi e paz cu Cristo mes a trece y laga pa nos tur.  Cu e luz di Cristo por ilumina tur e gobernantenan pa trece solucionnan cu nos pueblo mester. Danki Señor pa Bo misericordia, Bo compasion, Bo sabiduria y e paz cu lo Bo implanta den curazon di nos pueblo di Venezuela y Aruba. Tur esaki nos ta pidi Bo den nomber di Cristo Hesus di Nazaret. Amen

Posted in Orashon di Dia

Orashon di dia 11 januari 2018

IMG_1048

Awe nos ta bini den Bo presencia cu nos curazon na rudia y dedica na Bo pa roga Bo y suplica Bo pa tene misericordia cu cada un di nos y cu semper nos por keda atento na Bo yamada. Tata di misericordia Abo cu por y sa tur cos nos no por sconde nada pa Bo. Hopi biaha Señor pa motibo di nos lepra di picá nos ta keda exclui di nos famia, iglesia y nos comunidad. Pero Abo tin poder pa duna nos e dignidad cu nos a perde pa medio di nos picánan. Nos ta entrega Bo tur cos y ta roga Bo pa tene misericordia cu nos y purifica nos na alma, curpa, mente y spirito mescos cu Bo a haci cu e leproso den e Evangelio di awe ( Mc. 1, 40-45 ) Danki Señor cu Abo nunca ta discrimina nos y no ta exclui nos tampoco. Bo misericordia ta eterno y Bo amor pa nos ta asina grandi cu nos no ta comprende. Duna nos e curashi y animo pa nos no keda keto y pa tur momento nos por tin un dialogo cu Bo y pa nos duna testimonio di e grandeza di Bo amor y misericordia. Grandi y Todopoderoso Bo ta Señor! Amen.

Posted in Orashon di Dia

Orashon di dia 10 januari 2018

IMG_0998

Tata stima nos ta yama Bo danki pa un dia nobo cu nos por biba sintiendo Bo presencia den nos bida. Awe Bo ta tene cada un di nos na nos man y Bo ta duna nos forza pa lanta. Bo a duna nos salud pa cumpli cu tur e plannan cu Bo tin pa cada un di nos. Bo ta yama nos na nos nomber, laga nos ta disponibel pa scucha Bo apesar di tur e boroto di mundo. Mescos cu e suegra di Simon Bo ta desea di lanta nos di nos enfermedad, duna nos forza renoba pa lanta ariba for di nos miseria y pa sirbi Señor cu hopi animo.( Mc. 1, 29-39 ) Señor laga nos no ta indiferente na sufrimento di nos rumannan. Duna nos e gracia pa tur momento nos por alimenta nos mes atraves di orashon pa nos haya forza pa nos ta atento na e necesidadnan di nos rumannan. Cu semper nos por biba pa cumpli cu nos mision y haci Dios su boluntad den nos bida. Amen.

Posted in Orashon di Dia

Orashon di dia 9 januari 2018

Hesus su cara

Nos ta yama Dios danki cu E la permiti nos awe atrobe di mira luz di dia. Danki cu cada bez cu nos acerca na Bo cu confianza Bo ta atende nos suplicanan. Danki pa tur e momentonan cu Bo a cambia nos lagrimanan den speranza. Danki cu cada vez cu nos cay Bo ta lanta nos y Bo ta duna nos forza renoba. Señor nos ta reconoce Bo como nos Dios y e Señor di nos bida. Awe nos por lesa den e Evangelio con Hesus ta saca mal spirito for di un homber. ( Mc. 1, 21-28 ) Hesus tin autoridad y poder riba mal spirito. Cu e confianza y e humildad di un mucha awe nos ta suplica Bo Señor pa bini na nos encuentro pa siña y mustra nos cu autoridad pa lanta nos di cualquier situacion di picá cu nos por haya nos mes aden. Di tur e mal spiritonan cu ta aparta nos di nos meta y ta horta nos paz. Den tur libertad nos ta pidi Bo pa guía nos alma y mustra nos e camina di salbacion. Bo curazon misericordioso por tur cos. Danki Tata di amor pa scucha nos humilde oracion. Alaba Bo ta te den tur eternidad. Amen.

Posted in Orashon di Dia
January 2018
M T W T F S S
« Dec    
1234567
891011121314
15161718192021
22232425262728
293031