Orashon di dia 10 januari 2018

IMG_0998

Tata stima nos ta yama Bo danki pa un dia nobo cu nos por biba sintiendo Bo presencia den nos bida. Awe Bo ta tene cada un di nos na nos man y Bo ta duna nos forza pa lanta. Bo a duna nos salud pa cumpli cu tur e plannan cu Bo tin pa cada un di nos. Bo ta yama nos na nos nomber, laga nos ta disponibel pa scucha Bo apesar di tur e boroto di mundo. Mescos cu e suegra di Simon Bo ta desea di lanta nos di nos enfermedad, duna nos forza renoba pa lanta ariba for di nos miseria y pa sirbi Señor cu hopi animo.( Mc. 1, 29-39 ) Señor laga nos no ta indiferente na sufrimento di nos rumannan. Duna nos e gracia pa tur momento nos por alimenta nos mes atraves di orashon pa nos haya forza pa nos ta atento na e necesidadnan di nos rumannan. Cu semper nos por biba pa cumpli cu nos mision y haci Dios su boluntad den nos bida. Amen.

Posted in Orashon di Dia

Orashon di dia 9 januari 2018

Hesus su cara

Nos ta yama Dios danki cu E la permiti nos awe atrobe di mira luz di dia. Danki cu cada bez cu nos acerca na Bo cu confianza Bo ta atende nos suplicanan. Danki pa tur e momentonan cu Bo a cambia nos lagrimanan den speranza. Danki cu cada vez cu nos cay Bo ta lanta nos y Bo ta duna nos forza renoba. Señor nos ta reconoce Bo como nos Dios y e Señor di nos bida. Awe nos por lesa den e Evangelio con Hesus ta saca mal spirito for di un homber. ( Mc. 1, 21-28 ) Hesus tin autoridad y poder riba mal spirito. Cu e confianza y e humildad di un mucha awe nos ta suplica Bo Señor pa bini na nos encuentro pa siña y mustra nos cu autoridad pa lanta nos di cualquier situacion di picá cu nos por haya nos mes aden. Di tur e mal spiritonan cu ta aparta nos di nos meta y ta horta nos paz. Den tur libertad nos ta pidi Bo pa guía nos alma y mustra nos e camina di salbacion. Bo curazon misericordioso por tur cos. Danki Tata di amor pa scucha nos humilde oracion. Alaba Bo ta te den tur eternidad. Amen.

Posted in Orashon di Dia

Orashon di dia 8 januari 2018

7e43eb_Bautismo-Jesus.

Tata bondadoso mi ta desea di solicita Bo ayudo amoroso pa tur encuentro cu mi prohimo por desaroya den paz bou e gracia di Bo compania. Abo so por duna nos forza pa nos por sa di biba nos bida di un forma corecto. Mi ta desea di comprende cu apesar di mi debilidadnan, mi por conta cu Bo bendishon cu ta yuda mi vence e dificultadnan y pa duna mi forza pa mi por duna lo miho di mi den cada circunstancia. Awe nos ta celebra Bautismo di Señor cu ta cera e temporada di Pasco di Nacemento. Hesus ta acerca Huan pa wordo batisa y asina ta cuminsa su bida publico. ( Mc. 1, 7-11 ) Señor pa medio di nos Bautismo nos ta haya purificacion di nos picánan y nos ta ricibi e uncion di Spirito Santo. Dios Tata ta anuncia cu pa medio di Hesus nos ta recupera e amistad perdi y nos ta renace den un bida renoba, un bida nobo pa medio di e Spirito Santo. Danki Señor cu nos por pertenece na Bo pueblo, e pueblo di Dios. Danki cu Bo a manda Bo Yiu Hesus cu ta perfecto pa purifica nos cu ta hende pecador pa nos por haya salbacion, e Bida Eterno. Amen.

Posted in Orashon di Dia

Orashon di dia 7 januari 2018

Epifania-del-señor-A

Dios di amor y bondad mi ta gradici Bo, bendishona Bo y alaba Bo pasobra pa medio di Bo mi por cuminsa un dia nobo yen di speranza y forza. Abo ta esun cu ta sostene mi y ta impulsa mi pa sigui pa dilanti apesar di tur obstaculo. Danki pa tur oportunidad cu Bo ta duna cada un di nos pa biba. Awe ta Fiesta di Epifania di Señor, e manifestacion di Señor na henter mundo. Pa e tres reynan e strea cu a aparece na shelo ta hiba nan na busca e gran luz di Hesus. Nan ta sigui fielmente e luz cu ta ilumina nan interiormente pa nan tin un encuentro cu Hesus. Dios ta revela su mes no solamente na e wardadornan y hudiunan sino tambe na e sabionan, riconan y poderosonan di tur parti di mundo. ( Mt. 2, 1-12) Señor nos Dios permiti cu riba e fiesta aki di Epifania di Señor, e strea guia nos, compaña nos y yuda nos orienta nos bida, di nos famia y di tur esnan cu Bo ta pone den nos caminda. Laga nos bai na e encuentro cu Hesus cu ta e luz pa ilumina nos bida pa nos laga tur loke ta scuridad atras y bai adora Hesus y ofrece henter nos ser,  oro cu ta e valornan cu nos a ricibi di dj’E, e mira cu ta nos miseria, nos limitacion y e sensia ta nos alabanza y glorificacionnan na su misericordia. Amen.

Posted in Orashon di Dia

Orashon di dia 6 januari 2018

IMG_2751

Trempan nos ta busca Bo Dios, Abo cu ta nos Tata bondadoso. Nos ta Bo preto di wowo, yiunan cu Bo ta stima cu un amor eterno, un amor incondicional. Danki pa e regalo di bida. Danki pa e promesa di Bo Spirito Santo pa yuda nos tur momento di nos bida. Guia nos pasonan y bisa nos kico nos mester haci y manda nos hacié. Awe den e Evangelio Bo ta bisa nos cu net ora Hesus a sali for di awa, E la mira shelo sker habri y Spirito Santo a baha riba dj’E manera un palomba. A zona un stem for di shelo:” Abo ta mi Yiu stima, Bo ta legria di mi curazon.” ( Mc. 1, 7-11) Dios nos Tata ta anuncia na cada un di nos cu Hesus ta su Yiu stima, e legria di su curazon. Cu ora nos acepta Hesus den nos curazon na ora di nos Boutismo Spirito Santo ta bini biba cerca nos y yuda nos cumpli cu tur loke Dios ta desea di nos. Spirito Santo, alma di nos alma, nos ta alaba Bo di profundo di nos curazon, guia nos, ilumina nos y compaña nos tur momento den nos caminda. Amen.

Posted in Orashon di Dia

Orashon di dia 5 januari 2018

IMG_0960

Tata mi ta kere firmemente cu cada dia cu nos lanta Bo ta drama Bo misericordia riba nos. Danki pa bini den nos bida, sana nos curazon y duna nos cada dia di nobo un otro oportunidad pa ta un miho hende, un hende renoba y purifica pa medio di Bo amor puro y sincero. Awe Hesus ta invita cada un di nos pa sigui’E. ( Hn. 1, 43-51 ) E siguimento di Hesus ta implica renuncia asta na nos mes, nos caprichonan pa puro amor pa nos rumannan. Cuanto necesidad tin den nos mundo actual di sembra amor den e curazonnan. Nos ta e prome yamanan pa duna muestra di e amor di Dios. Tata di amor pa medio di amor solamente nos por logra cosnan grandi. Sana nos pa medio di Bo amor, restaura y libera nos alma di dolornan y resentimiento. Laga e amor pa nos rumannan por ta desinteresadamente sin spera nada a cambio. Nos sa cu ora tin amor tur cos ta posibel asta den cosnan cu nos ta kere ta imposibel. Yuda nos agrada Bo nos Bon Dios haciendo cosnan simpel pero cu un amor grandi Amen.

Posted in Orashon di Dia

Orashon di dia 4 januari 2018

 cordero de Dios
Danki Tata cu Bo ta den e prome pensamento di dia. Awe mi ta desea di entrega Bo tur mi preocupacionnan, dolornan, tristeza y problemanan. Abo ta e unico cu tin solucion pa tur esakinan. Danki cu cada un di nos por conta cu Bo tur momento, cu Bo sosten y Bo apoyo. Ta cu Bo yudansa so tur nos soñonan por wordo realisa. Grandi Bo ta Señor!
Bo ta hiba nos na awanan trankil pa nos bolbe haya forza. Awe e Palabra di Dios ta invita nos pa reconoce Hesus den nos bida. Cu apesar di tur nos quehacernan di dia pa nos por pone tempo pa por tin un encuentro intimo, personal cu Hesus. Pa Hesus por cana hunto cu nos pa nos no perde e caminda. Hesus ta e Lamchi di Dios cu ta kita tur picá di mundo.( Hn. 1, 35-42 ) Pesey nos mester busk’E pa e por cambia nos bida. E ta esun cu ta bin lanta nos for di picá y mustra nos e caminda pa sigui pa dilanti. Dios di amor y bondad den Bo nos ta confia nos bida, restaura nos bida y sana nos na alma, curpa, mente y spirito pa medio di Cristo nos Señor kende ta reina den tur siglo y siglonan. Amen.
Posted in Orashon di Dia

Orashon di dia 3 januari 2018

spirito santo 1

Tata celestial danki pa mi bida, e amor y tur e bendicionnan cu Bo ta regala mi cada momento. Abo ta Dios cu por alcansa tur cos, Dios di lo imposibel y di abundancia generoso. Pesey nos ta recuri na Bo pa implora Bo yudansa. Den Bo Palabra awe Huan Boutista ta bisa ken Hesus ta. Cu E ta e Lamchi di Dios cu ta kita picá di mundo. ( Hn. 1, 29-34 ) Mescos cu Huan Boutista nos tambe mester testigua ken Hesus ta pa nos. Kico E la haci den nos bida. Tata duna nos curashi y un fe firme pa medio di Bo Spirito Santo pa nos por testigua pa medio di nos bida ken Hesus ta y kico E la haci pa nos. Cu Hesus tin poder pa transforma nos bida, pa pordona tur nos picánan y duna nos un otro oportunidad pa cuminsa di nobo den un bida completamente renoba. Danki Hesus cu semper Bo tey pa nos y ta dispuesto pa yuda cada un di nos pa nos por yega mas cerca di Bo. Abo ta nos refugio y nos amparo. E amigo fiel cu nunca ta faya. Bendishona Bo ta! Tur Honor Y Gloria ta pa Bo. Amen.

Posted in Orashon di Dia

Orashon di dia 2 januari 2018

IMG_0971

Danki Tata santo pa drama Bo amor y bendishon riba mi cu e regalo di Bo presencia den mi bida. Yena cada un di nos awe cu Bo gracia na abundancia. Yena nos cu Bo poder, Bo compasion y tur loke nos mester pa sigui padilanti. Danki pa tur e forza cu Bo ta duna cada un di nos pa alcansa nos meta y cumpli cu tur e proposito cu Bo a planea pa nos bida. Bendishona Bo ta Tata di amor y bondad! Nos por lesa den e Evangelio di awe cu Huan Boutista ta predika cu e ta batisa cu awa, pero tin un cu boso no conoce meimei di boso. E ta bini despues di mi, ma mi no ta digno pa ni sikiera buk los su sandalia. ( Hn. 1, 19-28 ) Huan den tur humildad tawata predika tocante Hesus. E la mustra e hendenan cu Hesus ta mas grandi cu ne y cu su poder ta inmenso. Tata Todopoderoso Abo ta e mesun di ayera, awe, mañan y semper. Bo no a cambia y te awendia Bo ta yama nos pa bini cerca Bo. Pa nos por habri nos curazon pa Bo por drenta y cambia nos bida. Pa Bo por purifica nos cu e awa di Boutismo y pa Spirito Santo bin guia nos bida y duna nos un bida nobo, un bida completamente renoba. Amen.

Posted in Orashon di Dia

Orashon di dia 1 januari 2018

 

new-year-wishes-image

Cu un curazon inmensamente agradecido na Papa Dios awe nos ta bini dilanti trono di su gracia pa gradici Tata cu nos por a habri un otro aña. Un aña cu un bes mas nos ta turista riba e mundo aki y Tata Dios ta e agente di biahe. E tin tur nos rutanan y destino den su man y tur cos a worda regla caba. Ta keda solamente pa nos confia den Dios y disfruta di e trip cu yama bida. Nos ta haya 365 dia atrobe regalo pa nos por disfruta. Laga nos pone tur nos plannan den mannan di Dios. Danki Tata pa un aña mas cu nos por disfruta di dije. Danki pa nos bida, salud y e forza cu Bo ta duna nos pa nos por cumpli cada dia di nobo cu Bo boluntad. Danki pa nos famia, pa tur nos sernan keri, nos amigonan, pa e pan di cada dia, pa nos trabao, pa e dak riba nos cabes. Danki pa nos pais Aruba cu nos por gosa di un democracia. Danki pa nos rumannan den Cristo. Danki pa manda Hesus pa nos por haya salbacion y bida eterno. Danki pa Santa Maria, Mama di Dios cu awe nos ta celebra y cu tambe ta Mama di Iglesia. Nos ta alaba Bo Señor pa Bo grandeza y duna Bo tur Honor y Gloria. Amen.

Posted in Orashon di Dia
January 2018
M T W T F S S
« Dec    
1234567
891011121314
15161718192021
22232425262728
293031