Orashon di dia 6 augustus 2017

 transfiguracion de Hesus
Awe nos Iglesia ta celebra e Transfiguracion di Hesus. Un escena na unda Hesus riba cero di Tabor a cambia di aparencia. Su cara a cuminsa briya manera solo y su paña a bira briyante manera luz. Eynan Hesus ta aparece bisti di Gloria papiando cu Moises dilanti di su tres discipelnan preferi cu ta Pedro, Huan y Hacobo (Mat. 17,1-9) E Fiesta di Transfiguracion di Hesus ta siña nos cu oracion no ta cu nos ta aleha di mundo manera Pedro kier a haci, sino cu oracion ta conduci nos na e caminda, na e accion. E ta consisti cu continuamente nos ta subi cero pa un encuentro cu Dios, pa despues nos bolbe baha treciendo e amor y e forza cu nos ta haya eynan pa asina nos sirbi nos rumannan cu e mesun amor di Dios. Señor mi ta pidi Bo yuda nos aparta nos mes for di tur boroto di mundo cu por aleha nos di Bo presencia y cu nos por keda un momento nos so unda nos por scucha  y contempla Señor cara a cara. Amen.
Posted in Orashon di Dia

Orashon di dia 5 augustus 2017

San-Juan-Batista 1

Señor Dios, mi ta pone mi mes den Bo presencia pa scucha Bo Palabra y pa busca Bo boluntad. Ilumina nos entendimento pa comprende Bo berdad y duna forza na nos caracter pa nos por cambia loke den nos bida mester wordo cambia, pa nos por agrada Bo, bendiciona Bo y ser un persona digno di Bo amor. Laga cu nos curazon por ta un tabernakel bibo na unda e Hostia Bibo ta wordo conserva. Nunca nos no ta busca Dios leu sino dentro di nos mes. Den e profundidad di nos propio ser nos ta conbibi cu nos Dios. Awe nos por lesa tocante e morto di Huan Buatista. ( Mat. 14,1-12 ) Kico Huan a haci? Na prome luga anuncia Hesus,  cu e Salbador ta cerca, cu e Reino di Dios ta cerca. E tawata batisa hende y exorta nan pa nan comberti. Pa motibo di anuncia e berdad e la wordo mata. Awendia tambe tin paisnan cu tin persecucionnan pa motibo di nan fe. Danki Dios cu nos ta biba den un pais liber cu nos por profesa nos fe sin niun problema. Amen.

Posted in Orashon di Dia

Orashon di dia 4 augustus 2017

Holy Trinity 1
Señor danki pa e dia di awe cu Bo ta regala nos y cu Bo ta permiti nos resa pa nos sernan keri y pone nan den Bo presencia pa Bo yena nan cu Bo bendicion y Bo amor. Laga nos mira e mundo atravez di Bo wowonan, pa nos actua cu nos curazon y cu e sentimento uni na di Bo pa mira lo mehor di cada persona. Nos ta wak con Hesus ta wordo rechasa den su mesun pueblo. Hesus ta wordo huzga pa e luga di su procedencia, pa su famia, pa e palabranan cu E tawata bisa y pa su manera di duna enseñansa. ( Mat. 13, 54-58)  Hesus kier a mustra precisamente un Dios cu no kier represion ni sufrimento sino cu atraves di amor, Bo por sigui su boluntad, sin descuida niun hende, sin exclui y sin huzga. Señor Hesus yuda nos pa nos no huzga hende pa aparencia pero pa nos por hiba e Palabra cerca esnan cu mester di dje. Amen.
Posted in Orashon di Dia

Orashon di dia 3 augustus 2017

IMG_1048

Tata Bondadoso awe durante e dia mi ta desea di revisa mi accionnan den tur e contextonan unda mi ta encontra: den mi hogar, mi trabow y den mi comunidad. Mi ta desea di reconoce den cua momentonan mi no ta suficiente autentico cu loke Bo a siña mi. Mi kier habri mi curazon pa mi por identifica mi erornan, pa mi por acerca Dios sin sinti mi huzga. Cu mi por duna testimonio no solamente cu palabra sino tambe cu mi actuacion y mi pensamentonan. Den Bo Palabra Bo ta siña nos cu lo Bo separa e bon for di e malo ( Mat. 13, 47-53) Señor Bo ta duna cada un di nos e libertad pa scohe entre loke ta agradabel y loke no ta dilanti di Bo bista. Yuda nos pa semper nos por scohe pa loke ta agradabel den Bo bista pa medio di Cristo nos Señor. Amen.

Posted in Orashon di Dia

Orashon di dia 2 augustus 2017

IMG_0232

Dios di amor, danki pa Bo presencia awe den nos bida. Nos sa cu Bo ta compaña nos y cu Bo no ta bandona nos. Yuda nos tuma e miho decisionnan di nos bida, basa riba amor y respet. No laga ningun pensamento cu no ta di Bo podera di nos pensamento cu por distrae nos di alcanza e meta cu ta duna Bo Gloria. Abo ta nos tesoro scondi y nos ta haci lo necesario pa haye. ( Mat. 13, 44-46 ) Cu otro palabra nos ta busca un Kapel na unda Hesus ta exponi den Santisimo Sacramento. Tambe nos ta busca su amor den e Sacramento di Eucaristia. Nos ta busk’E tambe den e Sagrado Biblia. Señor mi ta desea cu mi alma ta sendi di amor pa Bo. Mi mester acudi na e rayonan di Bo misericordia pa mi por wordo transforma den un persona cu ta briya di amor y gana e tesoro cu Dios tin scondi pa mi. Amen.

Posted in Orashon di Dia

Orashon di dia 1 augustus 2017

Hesus Misericordioso # 3
Señor Abo cu ta rico na misericordia pordona cada un di nos, nos culpa y tur picanan Hopi biaha nos ta scucha e Palabra pero e enemigo ta bini y ta ranke for di nos curazon. Pero nos sa cu ainda nos ta na tempo pa arepenti. Sinembargo Bo ta mustra nos cu Bo ta un Dios di husticia. Cu na final di tempo Bo ta manda Bo angelnan pa haci husticia y ta separa e hacidonan di maldad for di e hustunan.  ( Mat. 13, 36-43 ) Dios Tata di misericordia, sembra e bon simia di misericordia abundantemente den nos ser y laga cu e por duna hopi fruta di bondad y amor den esnan cu mas tin mester di dje. Danki Señor pa no trata nos manera nos merece cu nos picanan. Amen.
Posted in Orashon di Dia

Orashon di dia 31 juli 2017

IMG_1435

Un siman nobo a inicia y laga nos gradici Dios na prome luga pa duna nos bida y e forza pa lanta y cuminsa e dia yen di animo y forza renoba. Awe nos ta recorda San Ignacio di Loyola, Sacerdote. E la drenta den e carera militar pero na edad di 30 aña siendo capitan e la wordo herida gravemente. Eynan ta unda su caminda di combercion ta cuminsa. E la caba su estudio teologico na Paris y mas despues huntu cu algun compañero e la funda e Orden di Hesuitanan, un congregacion activo cu te dia di awe ta haciendo un trabow magnifico pa Gloria di Dios. Tata stima mi ta desea di pone awe e poco cu mi tin y ta den Bo mannan poderoso cu por transforma tur cos. Abo ta e mata Grandi di mosterd  y ami ta e simia di mosterd cu ta e simia di mas chikito y fragil cu den Bo ta bira grandi y fuerte ( Mat. 13, 31-35 ) Amen.

Posted in Orashon di Dia

Orashon di dia 30 juli 2017

Cristo Rey limpi

Awe ta un otro dia mas cu Señor a ragala cada un di nos pa cual nos mester ta sumamente agradecido na Dios. Podise nos no a lanta shen porciento, nos por tin dolor aki aya, of problema, un tristeza, un bashi den nos curazon of un soledad. Tur esaki no ta nada compara cu loke nos Señor Hesus a pasa pa nos salbacion. Pesey manera e Palabra ta bisa nos awe cu nos como creyente mester descubri e Tesoro unico cu ta Cristo y su Reino. ( Mt. 13, 44-52 ) E ta un decision y e tin su riesgonan. Prome cu nos renuncia na algo nos mester prefera un Hende. Dicidi pa Esun cu no ta kita nada y ta duna tur cos. Tuma un paso, supera obstaculos, tuma riesgo pa gana algo. Ta berdad cu esun cu tuma riesgo Señor no lo defraude y ora un hende tuma e prome paso cerca Hesus, lo e descubri cu E tawata spera su yegada caba cu su brasanan habri. E descubrimento aki ta un Don di Dios cu nos por haye solamente cu oracion humilde y confia y cu e deseo di sirbishi generoso na nos rumannan. Señor duna mi e sabiduria pa mi por descubri den Bo e Tesoro di mas valioso y pa mi por sa di conserva e Tesoro ey te den tur eternidad Amen.

Posted in Orashon di Dia

Orashon di dia 29 juli 2017

santa marta

Awe nos ta recorda Santa Marta, ruman di Maria y Lazaro, patrono di lo imposibel. Ta na Marta cu Hesus ta bisa den e Evangelio di San Lucas 10, 41:” Marta, Marta, bo ta preocupa y den tension pa hopi cos, ma un cos so ta necesario, Maria a scohe e miho parti y lo no kita esey for di dje.” Marta semper a mustra su gran habilidad di sirbishi. Semper e tawata mas activo y cla pa yuda. Marta tawata tin un fe profundo y e la kere cu apesar cu su ruman Lazaro a muri cu tur cos cu Hesus pidi Dios E lo concede. Marta a kere cu Hesus ta e Mesias, e Yiu di Dios cu a bini na mundo pa rescata nos y duna nos bida y bida na abundancia. ( Huan 11,19-27 )Hesus Abo ta e resureccion y Bida pesey nos ta pidi Bo pa duna nos Bo mesun bida pa hibe na esnan cu mester di dje. Laga cu nos por siña di Marta su sirbishi y hospitalidad. Yuda nos comprende cu den un encuentro cu bo cada dia nos accionnan y trabownan lo ta mas fructifero y bendishona. Aleha tur preocupacion, angustia, stress y permiti nos ricibi Bo como nos huesped principal.  Amen

Posted in Orashon di Dia

Orashon di dia 28 juli 2017

IMG_2936

Cu gran alegria nos a lanta awe sabiendo cu nos no ta nos so. Cu Abo Tata ta yena nos cu Bo amor y cu nos por conta awe atrobe cu Bo Palabra. Danki Tata pa tanto bondad y generosidad. Bo Palabra ta bisa nos awe cu no ta basta cu nos tin un encuentro cu e Palabra di Dios solamente pero nos mester aplike den nos bida tambe di tur dia. Solamente ora nos scucha e Palabra y pone den practica nos por tin un alegria cu ta perdura y cu ta compaña nos cada dia. Si enberdad nos ta laga e Palabra di Dios bira realidad den nos bida, nos sa cu nos ta yama pa cumpli cu cada un di e mandamentonan cu Señor a ecomenda nos. Y ora nos cumpli cu nan nos tin un bida den abundancia, un bida di gracia cu ta haci nos biba den un comunion cu Dios y cu nos rumannan. E Palabra di Dios ta haci nos sinti tur e amor di un Tata cu ta recorda cada un di nos cu nos no ta nos so, cu E mes ta nos siguridad y fortaleza. Nos curazon mester ta e tereno unda e simia di e Palabra di Dios ta duna fruta na abundancia y e simia ey nos mester sembre den e curazon di hopi mas rumannan cu ainda no a conoce e amor di Tata( Mat.13,18-23 ) Danki Tata Santo cu nos por conta cu Bo cada momento di nos bida. Amen.

Posted in Orashon di Dia
August 2017
M T W T F S S
« Jul    
 123456
78910111213
14151617181920
21222324252627
28293031